اسلام آباد۔18جنوری(اے پی پی) صدر مملکت ڈاکٹر عارف علوی آکھیے جو ٹیکنالوجی دی مدد نال تعلیم اتے خواندگی کوں پرے دے علاقیں تئیں پڄایا ونڄ سڳدے ،تعلیمی شعبے اچ انفارمیشن ٹیکنالوجی دے استعمال نال خرچے گھٹ تھیسن ،انفارمیشن ٹیکنالوجی نال تعلیم دا معیار برقرار رکھݨ دے نال طالبیں دی تعداد ودھائی ونڄ سڳدی اے ۔ صدر مملکت اے ڳالھ کشمیر ایجوکیشن فاؤنڈیشن دے وفد نال ملاقات اچ آکھی اے ۔ صدر مملکت ڈاکٹر عارف علوی آکھیے پاکستان اچ تقریباً 2 کروڑ 80 لکھ ٻال سکول نی ویندے،سکول نہ ونڄ سڳݨ آلے ٻالاں دی تعلیم سانڳے ہزاروں نویں اسکول درکار ہوسن ، ٻالاں دی تعلیم ، خواندگی ودھاوݨ سانڳے مسیتاں کوں تعلیمی مراکز دے طور تے استعمال کیتا ونڄ سڳدے ۔ انہاں آکھیے جو خواندگی دی شرح ودھاوݨ کیتے آزاد جموں و کشمیر دے تعلیمی شعبے اچ ٹیکنالوجی دا استعمال ودھاوݨا ہوسی ۔ وفد صدر مملکت کوں آزاد جموں و کشمیر اتے دیہی پنجاب اچ معیاری تعلیم و خواندگی دے ودھارے اچ فاؤنڈیشن دے کردار بارے ݙسایا ۔ملاقات اچ آزاد جموں و کشمیر ٹیکسٹ بک بورڈ دے چیئرمین سید طفیل حسین بخاری اتے فاؤنڈیشن دے چیئرمین مظفر محمد قریشی وی شریک ہن۔
