اسلام آباد۔12مئی (اے پی پی) وزیراعظم محمد شہبازشریف آکھیا جو انصاف دا دوہرا معیار قابل افسوس اے، اتحادی حکومت ملک اچ قانون دی حکمرانی کوں یقینی ٻݨاوݨ کیتے ہرممکن اقدام کریسی۔ ملک اچ سیاسی رہنماواں مقدمے اتے ناروا سلوک دا سامݨا کیتا پر عمران خان کوں رعایت ݙتی ویندی پی اے۔ اے انصاف دا دوہرا معیار اے۔ عدالتاں اچ عوام دے ہزاراں کیسز پھتے پن پر کجھ سیاسی شخصیات کوں ترجیح ݙے تے ضمانت ݙتی ویندی پی اے۔ 9 مئی دا ݙینھ سقوط ڈھاکہ وانڳ پاکستان دی تاریخ دا المناک ݙینھ اے، ملک اچ آئین اتے قانون دی علمدراری ہوسی بھانویں ایں کیتے جو وی نتیجے ہوسن بھگتسوں۔ جمعے کوں وفاقی کابینہ دے اجلاس اچ خطاب کریندیں ہوئیں وزیراعظم آکھیا جو اڄ ملک اوکھے حالات اچ اے۔ سابق حکومت جیڑھا گھنائونا کردار اداکیتے او اڄ ہک ٻہوں وݙوا سوالیہ نشان اے۔ جئیں ویلھے اڄوکی حکومت آئینی طریقے نال ٻݨی تاں عمران نیازی آکھیا جو اے امریکا سازش نال ٻݨوائی اے۔ عمران نیازی اتے اوندے حواری عوام کوں اے باور کراوݨ چاہندے ہن اتے بے شرمی نال کوڑ مریندے رہیے۔ جئیں دے بعد قومی سلامتی کمیٹی دے کئی اجلاس تھیے اتے انہاں دے اعلامیہ اچ اے نشابر کیتا ڳیا جو کوئی سازش نی تھئی۔ او امریکا نال پاکستان دے تعلقات کوں وڳاڑݨ کیتے چھیکڑی حد تئیں ڳیا ہئی۔ جݙاں آئی ایم ایف نال اساݙی ڳالھ چلدی پی ہئی تاں اوں ویلھے خیبر پختونخوااتے پنجاب دے وزرائے خزانہ توں آئی ایم ایف نال معاہدے کوں رکواوݨ کیتے خط لکھیے ڳے تانجو آئی ایف ایم نال معاہدہ نہ تھیوے اتے خدانخواستہ پاکستان دیوالیہ تھی ونڄے۔ عمران خان کئی واری سری لنکا دے حالت نال ملایا۔ وزیراعظم آکھیا جو عمران نیازی کوں دھاندلی نال جینویں وزیراعظم ٻݨوایا ڳیا او کہانی پوری قوم دے سامھے اے۔ ایں تے 2018 توں پہلے کم شروع تھی ڳیا ہئی۔ وزیراعظم آکھیا جو عمران نیازی ولوں کھنڈایا ڳیا اے زہر ہݨ تعلیمی اداریاں، کارخانیاں، مدرسیاں سودھے زندگی دے ہر طبقے اچ سرائیت کر ڳے۔ عمران نیازی دے خلاب نیب اتے ایف آئی اے جیڑھے مقدمے ٻݨائن او آزاد ادارے ہن۔ نیب نیازی ڳٹھ جوڑ ملک اچ تباہی مچا ݙتی ہئی۔ سرمایہ کاراں کوں ملک توں ٻھجا ݙتا ہئی۔ اڄ جئیں ویلھے نیب عمران نیازی تے غبن اتے کرپشن دے حقیقی مقدمے ٻݨائن تاں انصاف دی راہ اچ آہنی دیوار کھڑی کر ݙتی ڳی اے۔ عمران نیازی اپوزیشن کوں پوری دنیا اچ بدنام کرݨ دا پراپیگنڈا کیتا تاں اوں ویلھے عمران خان دے حواریاں ایجںدا ٻݨایا جو او ݙاہ سال فاشسٹ ڈکٹیٹر ہوسی۔ وزیراعظم آکھیا جو 9 مئی دا ݙینھ 16 دسمبر 1971 وانڳ پاکستان دی تاریخ دا المناک ترین ݙینھ اے۔ جݙاں سقوط ڈھاکہ تھیا تاں قائد دا پاکستان ݙو ٹوٹے تھیا اوں ویلھے وی ہر اکھ روندی پی ہئی۔ جݙاں ذوالفقار علی بھٹو داعدالتی قتل تھیا تاں لوکاں اپݨے آپ کوں نقصان پڄایا کہیں فوجی تنصیبات کوں ݙٹھا تک نہ۔ جݙاں محترمہ بینظیر بھٹو کوں شہید کیتا ڳیا اوں ویلھے ہک آمر حکومت دا سربراہ ہئی۔ اوں ویلھے احتجاج تھیا پر سابق صدر آصف علی زرداری اوں ویلھے پاکستان کھپے دا نعرہ لاتا ایں توں وݙی حب الوطنی ،صبر ،برداشت اتے پاکستانیت دا ثبوت ٻیا کیا تھی سڳدے۔ وزیراعظم آکھیا جو میاں نواز شریف کوں کوڑے مقدمے اچ سزا سݨائی ڳی۔ پانامہ دا ڈرامہ کر تے انہاں کوں اقامہ تے سزا ݙتی ڳی۔ وزیراعظم آکھیا جو اے فیصلہ عدالت کرݨے جو سٹھ ارب روپے دی کرپشن دے الزام درست ہن یا کائنا، دوست ملک دے ولی عہد خانہ کعبہ دے ماڈل آلا جیڑھا تحفہ انہاں کوں ݙتا ہئی اونکوں وی جعلی رسیداں تے ویچ ݙتا اوں ویلھے کہیں سوموٹو نوٹس کیوں نی ڳھدا۔ وزیراعظم آکھیا جو جݙاں او کوٹ لکھ پت جیل اچ ہن تاں انہاں کوں ایمبولینس دی سہولت وی کائنا ݙتی ڳی ہئی پر اساں سارا کجھ برداشت کیتا۔ اسلام آباد ہائی کورٹ عمران نیازی دی گرفتاری کوں قانونی قرار ݙتا پر سپریم کورٹ انہاں کوں خوش آمدید آکھیا۔ اے اساݙے دوہرے معیار ہن۔ عام لوکاں دی ضمانتاں اچ ݙا ݙاہ سال توں زیرالتواء ہن۔ انہاں دی سݨیڄ نی تھیندی۔ وزیراعظم آکھیا جو حساس تنصیبات تے جیڑھے حملے تھین انہاں جیڑھے بلوے آئے انہاں کیتے اکساوݨ آلا عمران نیازی اے۔ دشمن ملک توں ودھ ایں ݙیکھ کون خوش ہئی جیڑھا 75 سال اچ دشمن نی کر سڳیا او انہاں کیتے۔ وزیراعظم آکھیا جو ملک اچ آئین اتے قانون دی عملداری قائم کیتی ویسی۔ ایں کیتے جیڑھے وی نتیجے ہوسن ٻگھتسوں۔
