لاہور۔22اگست (اے پی پی) پنجاب ڈیزاسٹر مینجمنٹ اتھارٹی ساوݨ مینھ دے اٹھویں سپیل دے پیشِ نظر صوبے بھر کمشنرز اتے ڈپٹی کمشنرز کوں الرٹ جاری کر ݙتے۔ ترجمان پی ڈی ایم اے موجب “23 اگست دی رات توں مغربی ہوائیں صوبے دے اُتلے علاقیں اچ داخل تھیسن، جیں دے نتیجے اچ 23 توں 27 اگست تئیں زور دا مینھ وسݨ دا امکان اے ۔پی ڈی ایم اے وارننگ ݙتی جو انہاں مینھ پاروں دریائے جہلم، چناب، راوی، ستلج اتے انہاں نال لڳدے ندی نالیں اچ پاݨی دے وہݨ اچ نمایاں ودھارا تھی سڳدے۔دریائے ستلج اچ گنڈا سنگھ والا دی جاہ تے پاݨی دا وہݨ پہلے ہی ہک لکھ کیوسک ریکارڈ کیتا ڳئے۔ محکمہ موسمیات موجب “راولپنڈی، مری، گلیات، اٹک، چکوال، جہلم، منڈی بہا والدین، گجرات، گوجرانوالہ، حافظ آباد اتے وزیر آباد اچ زور دا مینھ وسݨ دا امکان اے ۔ ایویں لاہور، قصور، شیخوپورہ، سیالکوٹ، نارووال، میانوالی، خوشاب، سرگودھا، جھنگ، ننکانہ اتے ٹوبہ ٹیک سنگھ اچ وی مینھ وُٹھسی ۔جنوبی پنجاب اچ دیرہ غازی خان، بھکر، لیہ، ملتان، بہاولپور، بہاولنگر، راجن پور اتے رحیم یارخان اچ کھمݨ گاجاں نال مینھ وسݨ دی پیشگوئی کیتی ڳئی اے ۔ڈی جی پی ڈی ایم اے عرفان علی کاٹھیا دریائے ستلج نال لڳدے ضلعیں دی انتظامیہ کوں ہائی الرٹ رہݨ اتے پاٹ اچ موجود شہریاں کوں فوری طور تے محفوظ جاہ تے منتقل کرݨ دی ہدایت جاری کیتی اے ۔ انہاں آکھیا جو “لوکل گورنمنٹ، محکمہ زراعت، محکمہ آبپاشی، محکمہ صحت، محکمہ جنگلات، لائیو سٹاک اتے ٹرانسپورٹ سودھے سارے محکمے الرٹ رہن اتے پیشگی انتظامات مکمل کرن۔” ڈی جی پی ڈی ایم اے ہنگامی صورتحال نال نبڑݨ کیتے ریسکیو ٹیماں کوں حساس جہیں تے تعینات کرݨ، شہریاں کوں مسیتاں دے اعلانات اتے مقامی ذریعے توں وختی ݙساوݨ دی ہدایت جاری کیتی اے ۔ انہاں شہریاں توں اپیل کیتی جو ضلعی انتظامیہ اتے ریسکیو اداریں نال مکمل تعاون کرن اتے پی ڈی ایم اے دی ہدایت تے سختی نال عمل کرن۔” “ایمرجنسی دی صورت اچ شہری پی ڈی ایم اے ہیلپ لائن 1129 تے رابطہ کر سڳدن
