اسلام آباد۔26 اگست(اے پی پی)وزیراعظم محمد شہباز شریف سیلاب متاثرہ علاقیاں اچ پھسیے ہوئے لوکاں دے انخلا کیتے جاری آپریشن تکھا کرݨ اَتے متاثرہ علاقیاں اچ خوراک، ادویات اَتے خیمیاں دی فراہمی یقینی بݨاوݨ دی ہدایت کیتی اے۔ وزیراعظم محمد شہباز شریف دی صدارت اچ ملک دے مختلف علاقیاں اچ سیلابی صورتحال اَتے امدادی کاروائیاں بارے جائزہ اجلاس تھیا۔ وزیراعظم ہدایت کیتی جو دریائے ستلج دے سیلاب توں متاثرہ پنجاب دے ضلعیاں اچ ریسکیو آپریشنز کوں تیکھا کیتا ونڄے۔ انہاں سیلاب متاثرہ علاقیاں اچ پھسے ہوئے لوکاں دے انخلا کیتے جاری آپریشن اچ تیزی ڳھن آوݨ، متاثرہ علاقیاں اچ خوراک، ادویات اَتے خیمیاں دی فراہمی یقینی بݨاوݨ اَتے چیئرمین این ڈی ایم اے کوں پنجاب دے ڈیزاسٹر مینجمنٹ دے ادارے نال پورا رابطہ رکھݨ دی ہدایت کیتی۔ اجلاس ملک اچ سیلابی صورتحال اَتے امدادی سرگرمیاں تے بریفنگ اچ ݙسایا ڳیا جو دریائے ستلج اچ سیلاب دے حوالے نال اڳونہی اطلاع پاروں آبادی دے انخلا پاروں متاثرہ علاقیاں توں ہݨ تئیں کوئی جانی نقصان دی اطلاع نئیں ملی۔ دریائے ستلج دے سیلاب توں متاثرہ ضلعیاں اچ متعلقہ اداریاں دے ریسکیو آپریشنز جاری ہِن، ہݨ تئیں ہک لکھ 74 ہزار 74 لوکاں کوں محفوظ مقامات تے پُجایا ونج چُکیے۔ وزیر اعظم کوں ݙسایا ڳیا جو جسٹر اَتے دریائے چناب اچ مرالہ دے مقامات تے اچے درجے دا سیلاب اے، نالہ ڈیک اچ وی شدید سیلابی صورتحال اے، آندے 12 توں 24 گھنٹیاں اچ لاہور، گوجرانوالا، گجرات، راولپنڈی ڈویژناں، آزاد جموں و کشمیر دے ضلعیاں اچ شدید بارشاں جݙاں جو گلگت بلتستان دے کئی مقامات تے وی بارشاں دی امید اے۔ اجلاس اچ وفاقی وزیر منصوبہ بندی احسن اقبال، وفاقی وزیر موسمیاتی تبدیلی ڈاکٹر مصدق ملک، وفاقی وزیر مواصلات عبدالعلیم خان، وفاقی وزیر پاور ڈویژن سردار اویس احمد لغاری، وفاقی وزیر اطلاعات و نشریات عطاء اللہ تارڑ، وفاقی وزیر مذہبی امور سردار یوسف، وزیراعظم دے مشیر ڈاکٹر توقیر شاہ اَتے متعلقہ وݙے سرکاری افسراں نے شرکت کیتی۔
.jpg)
